Egoera makroekonomikoak argi-itzalak bizi ditu, azken aldian baldintza monetarioak nabarmen gogortu direlako. Alde batetik, kontsumoari eta enpleguari buruzko zifrek indartsu jarraitzen dute oraindik ere, langabezia-tasak % 6,4 eta % 3,8 baitira eurogunean eta AEBn, hurrenez hurren, minimo historikoetatik gertu. Horrela, bada, Ameriketako eta Espainiako ekonomiak, zeinek kontsumo pribatuarekiko mendekotasun handiagoa dute, % 2,1 eta % 1,8 hazi dira urte batetik bestera, hurrenez hurren, atzeraldi ekonomikoaren mailetatik oso urrun. Baina, bestalde, enpresarien konfiantza-adierazleak etengabe ahultzen ari dira. Beraz, euroguneko PMI konposatua ekonomia-uzkurdurako eremuan dago, ia azken hiru urteetako maila minimoetan. Gainera, nazioarteko merkataritzak ere ahultasuna erakusten du, eta, azken datuen arabera, urtetik urterako bilakaera -% 3,2koa izan da. Dirudienez, hurrengo hiruhilekoetan hazkunde ekonomiko txikiagoa izango da.
Amerikako ekonomia indartsu ibili da 2023an, udan aurkeztutako hazkunde-datuaren arabera. Horren ondorioz, 10 urterako bonu amerikarraren errentagarritasuna nabarmen handitu da, % 4,8ra iritsi arte (2007tik ez halako mailarik egon). Aldi berean, azpiko inflazioa moteltzen hasi da, eta hori, batez ere, epe luzeko tasa errealen hazkundearen ondorio da. Arraste-efektuagatik, bilakaera ekonomiko onagatik baino gehiago, 10 urterako Alemaniako bonuak % 2,9ko mailak jo ditu, 16 urteko maximoak, eta Espainiakoak, berriz, % 3,9ko mailak, alegia, 10 urteko maximoak. Gogoan izan bonuen errentagarritasunaren gorakada horiek zorroan mantendutako bonuen balorazioan beherakada paraleloa eragiten dutela, eta, hortaz, errenta finkoko funtsen errentagarritasuna oso zaila izaten ari dela ekitaldi honetan.
Inflazioari dagokionez, AEBk azpiko inflazioaren datua aurkeztu du. Hobetzeko joerari eusten dio, hilabetez hilabete % 0,1 igotzen da, eta, hala, prezioen igoera altuak atzean uzten dira. Eurogunearen kasuan, zeinak erritmo apalagoan egin baitu hobera, iraileko urtetik urterako inflazioa % 4,3koa izan da, bi urteko minimoa, eta azpikoa % 4,5ekoa, aurreko % 5,3aren aldean. Horrekin batera, AEBetako tasa errealak 2008tik izandako altuenak dira, eta arrazoizkoena interes-tasen igoera handiagorik behar ez izatea da, edo, behintzat, igoera horiek laster gelditzea. Espero izatekoa da banku zentralek balantzeak murriztea, COVID-19aren osasun-krisian asko handitu baitziren.
Inflazio-datuek hobera egiten jarraitzen dute, nahiz eta gasaren (+% 40 gutxi gorabehera uztailetik) eta petrolioaren (+% 12 gutxi gorabehera hiru hilabetean) prezioek gorakada handia izan duten, LPEEren ekoizpen-murrizketen hedapenaren eta Australian oso garrantzitsuak diren gas-eremuetan jazotako gertakari bakan batzuen ondorioz. Horrez gain, urriaren hasieran Israelen izandako erasoak ziurgabetasun handiagoa dakarkio energia-merkatuari.
Higiezinen sektoreak ere kezka sortzen du, oso handia baita. Izan ere, finantza-kostuak izugarri hazi direnez, eragiketa-bolumenak atzerakada nabarmena izan du, bai eta aktiboen prezioak ere, geografiaren arabera alde handiak dauden arren.
Finantza-merkatuen harira, inbertitzaileak arriskuak hartzen ari dira, eta hori errenta aldakorreko eta high yield errenta finkoko indizeen bilakaera onean islatzen da. Beraz, Eurostoxx50 eta S&P500 indizeek % 10,04ko eta % 11,68ko errentagarritasunekin itxi zuten hiruhilekoa, hurrenez hurren. Bestalde, Ibex 35 indizeak % 14,5 egin zuen gora aldi berean, banku-sektorearen bilakaera erlatibo hobeak lagunduta. Esan dugun bezala, errenta finkoaren zatian, arrisku handieneko bonuek (high yield) izan dute portaera onena, batez beste % 5 inguruko errebalorizazioak izan baitituzte, kalitate handiagoko bonuen (investment grade) % 0 inguruko errentagarritasunen aurrean.
Ziurgabetasun eta dezelerazio ekonomikoko testuinguru horretan, gure aurreikuspen-plan nagusiek errentagarritasun positiboekin amaitu zuten hiruhilekoa: +%7,5 errenta aldakorreko planarentzat, +%1,6 errenta finkoko planarentzat eta +%3,8 gure plan mistoarentzat, indizeak baino pixka bat beherago, kokapen kontserbadoreagoagatik eta inbertsioen kalitate handiagoko kokapenagatik; hala nabari da, bereziki, urte negatiboetan (2022an, adibidez).
