2023. urtea eztabaida batez bukatu zen, alegia, ea ekonomiak lur-hartze leuna lortuko zuen ala atzeraldi ekonomikoko garai bat hasiko ote zen. Adostasuna lortzen zuen puntu bakarra zen moteltze ekonomikoko testuinguru bat genuela aurrez aurre, interes-tasek 2022an hasi zuten igoera gogorren eraginez; gaur egun, tasa horiek historiako handienen parekoak dira. Horregatik, eta inflazioa gero eta motelagoa izateari esker, espero zen 2024an interes-tasak etengabe jaitsizko zirela, Banku Zentralek aginduta. Merkatuari buruko aurreikuspenekin gertatu ohi denez, espero zena ez zen inola ere bete; aldiz, ekonomiak hasieran espero zen baino askoz ere jokabide hobea izan du 2024ko hasieran, batez ere amerikarrak, eta, hortaz, lehen aipatutako interes-tasen jaitsierak indargabetu egin ziren neurri handi batean.
Beraz, lehenengo hiruhilekoan, AEBetako hazkundeari buruz egindako estimazioak gorantz berrikusi dira etengabe, eta Nazioarteko Diru Funtsa (NDF) da hori egin duen azkena; bere iritziz, hazkundea % 2,7 izango zen 2024an, eta ez aurreikusitako % 2,1. Eurogunearen kasua oso bestelakoa da; izan ere, 2024rako estimatutako hazkundea % 0,8 besterik ez da, batez ere Alemaniaren egoera ahulagatik; dela dena, badira nolabaiteko hobekuntza iragartzen duten zenbait adierazle.
Inflazioari dagokionez, beherantz jarraitzen badu ere, aurreko hilabeteetan baino astiroago jaisten ari da, eta horrek zentzuzkoa dirudi. Eurogunean, martxoko inflazioren eta azpiko inflazioaren tasak % 2,4 eta % 2,9 izan ziren, hurrenez hurren; AEBetan, berriz, hilabetea % 2,7 eta % 2,8ko tasekin amaitu zen. Gogoan izan behar dugu, nonbait, inflazio-schockaren gailurrean Euroguneko inflazio-tasak % 10etik gorakoak izan zirela.
Merkatuak errealitate horren aurrean izan duen erreakzioa harrera onekoa izan da; hala, hazkunde ekonomikoaren datu onei esker, arrisku-aktiboek, hau da, kreditu-kalitate txikiko akzioek eta bonuek (high yield), oso jokabide positiboa izan dute urteko lehenengo tarte honetan. Errenta aldakorraren adierazle nagusiek % 10 inguruko errentagarritasun positiboekin itxi zuten hiruhilekoa; Europako kalitate txikiko bonuen bilakaera jasotzen duen Bloomberg Pan-European High Yield indizeak, berriz, + % 1,99 egin zuen aurrera lehenengo hiru hilabeteetan.
Errenta finkoren kasuan, merkatuan nagusitu den konplazentziaren eraginez, bai kreditu-diferentzialek eta bai finantza-egoera txarragoan dauden herrialdeetako arrisku-primek (Italiaren kasuan bezala) estutzen jarraitu dute arriskurik gabeko aktiboaren aurrean; izan ere, tasa-jaitsiera txikiagoak espero zirenez, lehen esan dugun bezala, aktibo horren errentagarritasunek gora egin dute kurbaren tarte guztietan. Horregatik, jaulkitzaile publikoen europar bonuen eta kalitatezko bonuen (investment grade) balorazioek atzerapenak izan zituzten hots, - % 1,67 eta - % 0,5, hurrenez hurren. Kalitate handiko bonuetan inbertituta egonda galerarik ez izateko modua izan da iraupenarekiko esposizioa kontrolatzea, Errenta Finkoko Surnepentsioaren kasuan bezala; izan ere, honek % 0,30eko errentagarritasun positiboarekin bukatu zuen hiruhilekoa, kreditu-kalitate bikaineko eta iraupen laburreko bonuetan izandako posizio kontserbadoreari esker.
Errenta aldakorrari dagokionez, indize nagusiek bilakaera positiboa izan badute ere, bilakaera hori sektorez sektore aztertzen badugu, honako hau ondorioztatu dezakegu: defentsiboagoak diren sektore batzuetan, hala nola oinarrizko sektorean edo utilityen sektorean, - % 1 eta -% 5eko jaitsierak gertatu ziren, hurrenez hurren; ziklo ekonomikoarekin mendetasun handiagoa duten sektoreetan, hala nola ibilgailuen, kontsumo diskrezionalaren edo bankuen sektorean, berriz, % 15, % 10 eta % 18ko balio-igoerak gertatu ziren, hurrenez hurren. Horren eraginez, 2023an S&P500aren balio teknologikoekin gertatu zen bezala, sektore konkretu batekin oso mendetasun handia zuten indizeek, hala nola Ibex 35ek, banku-sektoreak horren pisuaren herena duenez, euren dibertsifikaziorik ezari zor diote euren bilakaera ona. Gure Errenta Aldakorreko Surnepentsio planaren kasuan, izaera defentsiboagoa duten sektoreetan gehiegizko haztapena duenez, eta bankuen moduko sektore ziklikoetan gutxiegizko haztapena duenez, + % 1,27ko errentagarritasunarekin bukatu du hiruhilekoa, indize nagusien atzetik. Hain zuzen ere, gure planak izan ohi duen posizionamendu kontserbadoreago horren ondorioz, epe luzera modu finkoan gainditu ahal izan dira indizeak, batez ere sasoi negatiboetan, hala nola 2018 edo 2022an.
Datozen hilabeteei begira, Banku Zentralen jardunak , ekonomiaren eta prezioen bilakaerak baldintzatuta, finantza-merkatuen bilakaera markatzen jarraituko du. Gainera, gertutik jarraituko ditugu beste arrisku batzuk, hala nola gatazka geopolitikoak eta herrialdeetako defizit fiskalen bilakaera.
Azkenik, 2024ko azaroan, AEBetako presidentziarako hauteskundeak egingo dira, eta horri lotutako arrisku handienetako bat da Donald Trump Etxe Zurira itzultzea. Kasu hipotetiko horretan, defizit publikoak, NATOtik irteteko aukerak, merkatu energetikoak edo arantzel-neurriek presentzia izango dute ekonomian eta finantza-merkatuetan.
