Argi dago gizartea etengabe ari dela eboluzionatzen eta aldaketa bakoitzarekin onurak sortzen direla, baina baita kontraesanak ere. Gaur egungo arazo nagusietako bat, batez ere hiriguneetan, pertsonen mugikortasuna da, eta hona hemen horren arrazoietako batzuk: ibilgailuak eta erregaiak garestiak dira, zaila da aparkalekua aurkitzea, garraio-zerbitzu publikoa dimentsionatzea falta da, mugak daude kutsaduragatik edo etxebizitzak garestiak dira hiriguneetan.
Arazo horiek konpontzearren, sektore pribatuak (fabrikatzaileak, saltzaileak eta alokairu-enpresak) eta toki-administrazioek mugikortasun pertsonaleko ibilgailuen (MPI) erabilera sustatu dute: bizikletak, patinete elektrikoak eta hainbat tramankuluren espektro zabala, pertsonak motorizaturik mugitu ahal izateko.
Horren guztiaren ondorioz, herritarren % 72k adierazi dute hirietan mugitzeko ohikoan erabiltzen duten modua aldatu dutela.
Gizartea erakunde publikoen erantzunaren aurretik doan beste kasu batzuetan bezala, dagoeneko egin dugu topo kezka handia sortzen ari diren arazoekin. Oraingoz ez da beharrezkoa horiek erabiltzeko lizentziarik lortzea, eta ez dago gutxieneko adinik ere. Ondorioz, ohikoa da erabiltzaileen eta hirugarrenen osotasun fisikorako arrisku handia eragin dezaketen egoerak topatzea:
- MPIen erabiltzaileen % 50ek aitortu du kaskorik gabe ibiltzen dela.
- % 71 espaloitik ibili izan da noizbait.
- % 45ek inoiz gainditu izan ditu ibilgailu horientzat ezarritako abiadura-mugak (25 km/h).
- MPI gehienek baimendutako abiadura-muga gaindi dezakete; beraz, horien % 50 legez kanpokotzat jo daitekeela kalkulatzen da.
- Erabiltzaile batzuk hiriarteko bideetan ibiltzen dira.
- Erabiltzaile batzuk bi bidaiarirekin ibiltzen dira.
MPIen hazkundeak, beste faktore sozioekonomiko batzuekin batera, hiriko istripuen tasa % 40 handitu du hamar urtean, eta kalkulatzen da hirietan zirkulazio-istripuengatik hildakoen % 8 ibilgailu horien erabiltzaileak direla (erabiltzaile zaurgarriak dira). Izan ere, Espainiako biztanleen % 9k dio eroriko edo istripu bat izan duela patinete batekin edo beste MPI batekin (2018an, patinete elektriko batek harrapatutako oinezko baten lehen heriotza erregistratu zen Espainian).
DGTren kalkuluen arabera, jarraibideei jarraitu ezean, mugitzeko modu berri horiek 700.000 ezbehar, 5.500 hildako eta 850.000 lesionatu eragin ditzakete 2021etik 2030era bitartean, hau da, % 24, % 18 eta % 22ko igoera egongo litzateke, hurrenez hurren, aurreko hamarkadarekin alderatuta.
