2025. urteak funtsezko aldaketak dakartza Gizarte Segurantzaren kotizazioetan, eta aldaketa horiek eragina dute bai langileengan eta bai enpresa eta autonomoengan. Horren guztiaren helburua da pentsio-sistema publikoaren epe luzerako nahikotasun eta jasangarritasunerantz aurrera egitea. Aldaketa horien artean, honako hauek nabarmentzen dira euren garrantzi bereziagatik:
- Kotizazio-oinarrien igoera
Gehieneko oinarriak % 4 inguru igoko dira, hilean 4.720tik 4.909ra pasatuz. Doikuntza horren helburua da biztanleriaren zahartzeagatik pentsioen gastuan gertatzen ari den hazkundeari aurre egitea; izan ere, arazo horrek hazten jarraitzen du bizi-itxaropena luzatzen den neurrian. Igoera horrek erronkak planteatzen ditu enpresetarako, zeren euren aurrekontu-partidak doitu beharko dituzte lanaren arloan.
- Belaunaldiarteko Ekitatearen Mekanismoa (BEM)
BEMek 0,1 puntuz igoko du kotizazio erantsia, eta, hala, 2025ean % 0,8ra iritsiko da (% 0,67 enpresaren kontura eta % 0,13 langilearen kontura). Doikuntza horrek 2.000 milioi euro ekarriko dizkio Gizarte Segurantzaren Erreserba Funtsari, eta horrek ahalbidetuko du etorkizuneko prestazioak presio demografikoen aurrean segurtatzea.
- Elkartasun-kuota
Elkartasun-kuota kotizazio erantsiko mekanismo bat da gehieneko kotizazio-oinarria gainditzen duten soldatetarako. Kuota enpresariaren eta langilearen artean banatu behar da: hurrenez hurren, % 83,4 eta % 16,6 ordainduko dute. 2025ean, kuota % 0,92 izango da gehieneko oinarria % 10eraino gainditzen duen soldata-zatirako, % 1 horren % 10 eta % 50 bitartean dagoen soldatarako, eta, azkenik, % 1,17 gehieneko oinarria % 50z baino gehiagoz gainditzen duen soldatarako. Doikuntza horrek, sistemaren sarrerak handitu ez ezik, ekarpen justua bermatu ere egin nahi du sarrera handiagoak dituztenen aldetik, Gizarte Segurantzaren izaera solidarioa indartuz.
